ନେତାଙ୍କ ଗୋଷ୍ଠୀ ବିବାଦରେ ଅଫିସର ମଲା କି?
ନୂଆପଡ଼ା ନିର୍ବାଚନରେ ଶାସକ ଦଳର ପ୍ରାର୍ଥୀଙ୍କୁ ଜିତାଇବା ପାଇଁ ମୋହନ ଗୋଷ୍ଠୀର ମନ୍ତ୍ରୀ, ନେତାମାନେ ଯେତିକି ସଂଘର୍ଷ କରୁଛନ୍ତି, ଶାସକ ଦଳର ଅଫିସରମାନେ ସରକାରଙ୍କ ସୁଦୃଷ୍ଟିରେ ରହିିବା ମତଲବରେ ସରକାରୀ କଳକୁ ଅକାର୍ଯ୍ୟରେ ଲଗାଇ ଗୁଡିଏ ଅନାବଶ୍ୟକ କାର୍ଯ୍ୟ ମଧ୍ୟ କରୁଛନ୍ତି । ଗତ ସରକାରରେ ଥିବା ଅଫିସରମାନେ ଏହାର ନିଅଁ ଖୋଳିଥିଲେ ।
ପୁଲିସ ବିଭାଗର ଚୁଗୁଲିଆଙ୍କଠାରୁ ଯାହା ଜଣାପଡ଼ିଲା ସମ୍ପ୍ରତି ନୂଆପଡ଼ା ଜିଲ୍ଲାର ଦୁଇଜଣ ବଡ଼ ଅଫିସର ଚାପରେ ପଡ଼ି ମୁଖ୍ୟମନ୍ତ୍ରୀଙ୍କୁ ଖୁସି କରାଇବା ପାଇଁ ସଦଳବଳେ ଖରିଆର ରୋଡରେ ଥିବା ଗୋଟିଏ ବେସରକାରୀ ଘରେ ଅନ୍ଧାରିଆ ଚଢ଼ଉ କରି ପକାଇଲେ । ହେଲେ ସେ ଘରୁ କିଛି ବାହାରିଲା ନାହିଁ । ତେଣୁ କୁହାଯାଉଛି ଯେ ପୁଲିସ ବାବୁମାନେ ଚଢ଼ଉ ପୂର୍ବରୁ ହୋମୱାର୍କ କରିନଥିଲେ । ଅର୍ଥାତ୍ ଚଢ଼ଉ ପୂର୍ବରୁ ପୁଲିସ ସଠିକ୍ ସୂଚନା ଯୋଗାଡ଼ କରିନଥିଲା ଯେ ସେ ଘରେ ଭୋଟ କିଣାପାଇଁ କଳାଟଙ୍କା ଥିଲା କି ନଥିଲା । ଚଢ଼ଉରେ ସାମିଲ ଜଣେ ପୁଲିସ ଅଫିସରଙ୍କ କହିବା ମୁତାବକ ସେଠାରେ ପଇସା ଥିଲା । କିନ୍ତୁ ଗୋଷ୍ଠୀବିବାଦ କାରଣରୁ ଏଥର ବିଜେପି ପ୍ରାର୍ଥୀଙ୍କୁ ଯେମିତି ହେଉ ହରାଇବା ପାଇଁ ପରୋକ୍ଷରେ ଲାଗିଥିବା କିଛି ବିଜେପି ନେତା ଓ ଅଫିସର ବିଜେଡି ପାଖରେ ଆଗୁଆ ସୂଚନା ପହୁଁଚାଇ ଦେବାରୁ ସେମାନେ ଘର ଖାଲି କରିଦେଲେ । ସେଠାରୁ କିଛି ବି ସେପରି ମିଳିଲା ନାହିଁ ।
କଥାହେଉଛି ଏ ଘରଟିରେ ବିଜେଡିର ଜଣେ ଯୁବନେତା ନୂଆପଡ଼ା ନିର୍ବାଚନରେ ପ୍ରଚାର କରିବା ପାଇଁ ଭଡ଼ାରେ ରହୁଛନ୍ତି । ଘରଟା କିଛିଦିନ ପାଇଁ ଭଡ଼ାରେ ନିଆ ହୋଇଛି । ଯେଉଁ ବିଧାୟକଜଣକ ଏହି ଘରଟିକୁ ଭଡ଼ାରେ ନେଇଛନ୍ତି ସିଏ ଗତ ନିର୍ବାଚନରେ ନିଜ ନିର୍ବାଚନମଣ୍ଡଳୀରୁ ହାରିଛନ୍ତି । ତଥାପି ଦଳ ତାଙ୍କୁ ଷ୍ଟାର ପ୍ରଚାରକ କରିଛି କାରଣ ସିଏ ବଡ଼ଲୋକ । ତିନି ତିନିଟା ବିଭାଗର ମନ୍ତ୍ରୀ ଥିଲେ । ବିଜେଡିର ପୂର୍ବତନ ଅର୍ଥମନ୍ତ୍ରୀ ପ୍ରଫୁଲ୍ଲ ଘଡ଼େଇଙ୍କର ପୁଅ । ତେଣୁ ନୂଆପଡ଼ା ନିର୍ବାଚନରେ ସିଏ ଭୋଟପାଇଁ କଳାପଇସା ଉଡ଼ାଉଥିବେ ବୋଲି ଯେ କେହି ବିଶ୍ୱାସ କରିବାଟା ସ୍ୱାଭାବିକ । ତା’ସହିତ ତାଙ୍କୁ କେବଳ ବିଜେଡିର ନୁହେଁ ବରଂ ବିଜେଡିପି(ଅଥାତ୍ ବିଜେଡି ଓ ବିଜେପି ଉଭୟ ଦଳ)ର ନେତା ବୋଲି କୁହାଯାଉଛି । କାରଣ ବିଜେପିର ରାଜ୍ୟ ସଭାପତି ତଥା ଗୋଟିଏ ଗୋଷ୍ଠୀର ନେତା ମନମୋହନ ସାମଲ ଯିଏ କାଳେ ନିଜେ ମୁଖ୍ୟମନ୍ତ୍ରୀ ହେବାକୁ ଛକିଛନ୍ତି, ତାଙ୍କର ଏ ବାବୁ ନିଜ ଭଣଜା । ତେଣୁ ଲୋକେ ଏହି ବାବୁଙ୍କୁ ଆମେ ଯେତେବେଳେ ନୂଆପଡ଼ା ଗସ୍ତ(ଖୁଂଟିଆ ଭବନ ସଭା)ରେ ଯାଇଥିଲୁ ସେତେବେଳେ ଲୋକମାନେ କହିଥିଲେ ଯେ ଡାନି ଘଡେଇ ଖାଲି ପ୍ରଚାର ଦାୟିତ୍ୱ ନୁହେଁ, ଖର୍ଚ୍ଚର ମଧ୍ୟ ଦାୟିତ୍ୱ ନେଇଛନ୍ତି । ସେତେବେଳକୁ ସିଏ କୁଆଡ଼େ ଖାଲି ୫୦୦ ଟଙ୍କିଆ ବାଂଟିବା ଆରମ୍ଭ କରି ସାରିଥିଲେ । ଡାନିଙ୍କର ଯେଉଁ ପଇସା ଉଡ଼ୁଛି ସେଥିରେ ତାଙ୍କ ବାପାଙ୍କ ସହିତ ମାମୁଁଙ୍କର ବି କାଳେ ମାଲ ମିଶିଛି । ତେବେ ପଇସା ବଂଟା ଯାଉଛି ବିଜେଡି ପକ୍ଷରୁ । କାରଣ ଆମେ ଯାହା ଶୁଣିଲୁ ଉଭୟ ଚାହୁଁଛନ୍ତି ସେଠୁ ବିଜେପି ହାରୁ । ତେଣୁ ଏବେ ସରକାରରେ ଥିବା ମୋହନ ଗୋଷ୍ଠୀର ବିଜେପି ନେତା ଅଫିସରମାନେ ଭାବିଲେ ଡାନିଘରେ ଗୁଡ଼ାଏ କଳା ଟଙ୍କା ଗଦା ହୋଇକିରି ଅଛି । ଅଚାନକ ଚଢ଼ଉ କରି ଜବତ କରି ପକାଇବେ । କିନ୍ତୁ ସେ ଘରୁ କିଛି ମିଳିଲାନି । ଅଫିସର ଓ ପୁଲିସ ପହଂଚିବାବେଳକୁ ଘରର କେୟାରଟେକର ପଣ୍ଡାବାବୁ ଓ ଆଉ ଜଣେ ଦୁଇଜଣ ପୁଲିସକୁ ସର୍ଚ୍ଚୱାରେଂଟ ଦେଖେଇବାକୁ କହିବା ଓ ଅନ୍ୟ କଥାକହି କିଛିସମୟ ନେଇ ଯାଇଥିଲେ । ପୁଲିସ କିଛି ନଶୁଣି ସେମାନଙ୍କୁ ହଟେଇ ସେ ଘରେ ପଶିଥିଲେ ମଧ୍ୟ ସେଠୁ ମାଲସବୁ ବହୁ ପୂର୍ବରୁ ଅନ୍ୟତ୍ର ଚାଲିଯାଇଥିବାରୁ କିଛି ମିଳି ନଥିଲା । ଏବେ ବିଜେଡିକୁ ସରକାରଙ୍କ ବିରୁଦ୍ଧରେ ଚିକ୍ରାର କରିବାକୁ ଗୋଟା ସୁବର୍ଣ୍ଣ ସୁଯୋଗ ମିଳିଯାଇଛି । ଖରିଆର ରୋଡଠୁ ଆରମ୍ଭ କରି ଭୁବନେଶ୍ୱରଯାଏ ବିଜେଡି ଶୋଭାଯାତ୍ରା ବାହାର କରି ଚିକ୍ରାର କରିବା ଆରମ୍ଭ କଲାଣି । ଏଇଟା କିଛି ପରିମାଣରେ ସିମ୍ପାଥି ଭୋଟ ଜୁଟାଇବାରେ ବିଜେଡିକୁ ନିଶ୍ଚିତ ଦମ ଯୋଗାଉଛି ।
ପାଠକେ! ଏବର ସ୍ଥିତି କ’ଣ? ଆମକୁ ଯାହା ଖବର ମିଳୁଛି ନୂଆପଡ଼ାର ୫ଟି ଯାକ ବ୍ଲକ ନୂଆପଡ଼ା, ଖରିଆର, ସିନାପାଲୀ, ବୋଡେନ ଓ କୋମନାରେ କଂଗ୍ରେସ ଏକାକୀ କେଉଁଠି ବିଜେଡ଼ି ବିରୋଧରେ ତ କେଉଁଠି ବିଜେପି ବିରୋଧରେ ଲଢୁଛି । ଧରାଯାଉ କୋମନାରେ ଏହା ବିଜେଡିକୁ ଟକ୍କର ଦେଉଛି ତ ନୂଆପଡ଼ାରେ ବିଜେପି ବିରୋଧରେ ଲଢୁଛି । କଂଗ୍ରେସ ପ୍ରାର୍ଥୀଙ୍କର ସୁବିଧାଟି ହେଉଛି ସିଏ ଏଠାରେ ତିନି ବଡ଼ ଦଳର ପ୍ରାର୍ଥୀମାନଙ୍କ ଭିତରୁ ଏକମାତ୍ର ସ୍ଥାନୀୟ ପ୍ରାର୍ଥୀ । ବିଜେଡି ପ୍ରାର୍ଥୀ ଅତାବିରାରୁ ଆସିଥିବା ବେଳେ ବିଜେପି ପ୍ରାର୍ଥୀ ଗୁଜୁରାଟରୁ ଆସିଛନ୍ତି । ଯଦିଓ ଉଭୟ କୌଣସି ନା କୌଣସି ବାହାନା ଯୋଡ଼ି ସ୍ଥାନୀୟ ବୋଲି ନିଜକୁ ପ୍ରମାଣିତ କରୁଛନ୍ତି ହେଲେ ଭୋଟର ମଉନମୁଁହା; କିଏ ସ୍ଥାନୀୟ ଓ କିଏ ବାହାରିଆ ସବୁ ଜାଣିଛନ୍ତି । ଦୁଇରେ କଂଗ୍ରେସ ପ୍ରାର୍ଥୀଙ୍କର ସେହି ନିର୍ବାଚନମଣ୍ଡଳୀରେ ନିଜର କିଛି ଭୋଟ ଅଛି । ଯେମିତିକି ସିଏ ୨୦୧୪ରେ ୩୯,୬୫୪, ୨୦୧୯ରେ ୪୫,୩୧୭ ଏବଂ ୨୦୨୪ (ଗତ ନିର୍ବାଚନ)ରେ ୫୦,୯୪୧ ଭୋଟ ପାଇଥିଲେ । ଗତଥର କଂଗ୍ରେସର ଜଣେ ସଭାପତି ତାଙ୍କ ବିରୁଦ୍ଧରେ ପ୍ରାର୍ଥୀ ହୋଇ ୧୫,୦୦୦ ପାଖାପାଖି ଭୋଟ ପାଇଥିଲେ । ଦୁହିଁକୁ ଯୋଡିଲେ ଏବେ କଂଗ୍ରେସ ପ୍ରାର୍ଥୀଙ୍କର ପାଖାପାଖି ୬୫,୦୦୦ ଭୋଟ ହୋଇଯାଉଛି । ସିଏ ପୁଣି ହେଉଛନ୍ତି ଗଣ୍ଡ ସମ୍ପ୍ରଦାୟର ଲୋକ ଯେଉଁମାନଙ୍କ ସଂଖ୍ୟା ଏଠାରେ ଟିକେ ଅଧିକ । ହେଲେ ବି ତାଙ୍କ ଆଗରେ ଦୁଇଟି ମୁଖ୍ୟ ସମସ୍ୟା । ପ୍ରଥମଟି ଗଣ୍ଡ ସମ୍ପ୍ରଦାୟର କିଛି ନେତା ଏଥର ନିର୍ବାଚନରେ ଘାସିରାମଙ୍କୁ ବିରୋଧ କରିବାର ଶପଥ ନେଇଛନ୍ତି । ଦ୍ୱିତୀୟରେ ମାଝୀଙ୍କ ପାଖରେ ଏତେ କଳାପଇସା ବୋଧେ ନାହିଁ ଯେତେ ବିଜେଡି-ପି ଫୋପାଡ଼ି ପାରିବେ, ଆଉ ଯାହା ଏବେ ନିର୍ବାଚନ ଜିଣିବାର ମୁଖ୍ୟ ଆୟୁଧ । ନୂଆପଡ଼ା ୧୯୯୩ରେ ଅଲଗା ଗୋଟିଏ ଜିଲ୍ଲା ହେଲେ ବି ଏହା ଅଧିକାଂଶ ସମୟ ବିଜୁବାବୁଙ୍କ ସମର୍ଥକ ରହିଆସିଛି । ଗତ ନିର୍ବାଚନ ପର୍ଯ୍ୟନ୍ତ ବିଜେଡିର ରାଜେନ୍ଦ୍ର ଢୋଲକିଆ ଏଠାକାର ଲୋକପ୍ରିୟ ନେତା ଥିଲେ କିନ୍ତୁ ତାଙ୍କ ପୁତୁରା ଯେପରି ଖୋଲାଖୋଲି କହି ବୁଲୁଛନ୍ତି ଯେ ସିଏ ଟଙ୍କା ନେଇ ବିଜେପିକୁ ଯାଇଛନ୍ତି, ସେଇଟା ସ୍ଥାନୀୟ ଲୋକଙ୍କୁ ଭଲ ଲାଗୁନାହିଁ । ତେଣୁ କୁହାଯାଉଛି ଯେ ରାଜେନ୍ଦ୍ର ଢୋଲକିଆଙ୍କର ସବୁ ସିମ୍ପାଥୀ ଭୋଟ ବିଜେପି ପ୍ରାର୍ଥୀ ପାଇ ନପାରନ୍ତି । ତା ବ୍ୟତୀତ ବିଜେପିର କିଛି ନେତା ଭିତିରିଆ ବିଜେଡି ପ୍ରାର୍ଥୀଙ୍କୁ ସମର୍ଥନ କରୁଛନ୍ତି । ବସନ୍ତ ପଣ୍ଡାଙ୍କର ଜଣେ ନିକଟ ସମ୍ପର୍କୀୟ ବିଜେଡିରେ ଖୋଲାଖୋଲି ସାମିଲ ମଧ୍ୟ ହୋଇଗଲେଣି । ନବୀନବାବୁଙ୍କ ଗସ୍ତ ପରେ ପରେ ଏଠାରେ ସ୍ଥିତି ଆହୁରି ବଦଳିପାରେ ଓ ନୂଆପଡ଼ା ଉପନିର୍ବାଚନରେ ବିଜେଡି ହିଁ ‘ଡାର୍କ ହର୍ସ’ ହୋଇ ବାହାରିପାରେ ବୋଲି କିଛି ଲୋକ କହୁଛନ୍ତି । ଛାଡ଼ ହୋ! ଯିଏ ହେଉ । ଆମେ ତ ନୋଟା ପ୍ରିୟ ନରହରୀ, ଆମର କ’ଣ ଅଛି???
ମୂଳରୁ… ନାହିଁ…
ପାଠକେ! ଗତ ପକ୍ଷରେ ସାରାରାଜ୍ୟରେ ଗୋଟା ଅଯଥା ଚିକ୍ରାର ହେଲା । ବେଶୀ ତ ଚିକ୍ରାର କଲେ ଜଣମାଧ୍ୟମର ଘରୋଇ ଟିଭିଗଣ୍ଡାକ । କ’ଣ ନାଁ ବାତ୍ୟା ମାଡ଼ି ଆଉଛି । ତୀବ୍ର ଗତିରେ ମାଡ଼ି ଆସୁଛି ବାତ୍ୟା । ସମୁଦ୍ରରେ ବଳ ଗୋଟାଉଛି ବାତ୍ୟା । ଧୀରେ ଧୀରେ ବାତ୍ୟାର ଗତି ବଢୁଛି । ଇତ୍ୟାଦି ଇତ୍ୟାଦି । ବାତ୍ୟା ସମୟକୁ ଏ ବେସରକାରୀ ଟିଭି ଘୋଷକମାନଙ୍କର ଚିକ୍ରାରଭରା ଅଙ୍ଗଭଙ୍ଗୀକୁ ଦେଖିଲେ ଲାଗେ ୟାଙ୍କ ଶରୀର ଭିତରେ ଗୋଟା ଗୋଟା ଚାଇନା ମିଶିନି ଲାଗିଛି । କି ଚିକ୍ରାର । ଏ ଚିକ୍ରାରରେ ହେଲା କ’ଣ ଜାଣିଛନ୍ତି ବଜାରରୁ ହଠାତ୍ ଲୋକଙ୍କର ସବୁ ଅତ୍ୟାବଶ୍ୟକ ସାମଗ୍ରୀ ଉଭେଇ ଗଲା । କଳାବଜାର ଚାଲିଲା । ଜିନିଷ ସବୁ ମିଲିଲା କିନ୍ତୁ ବହୁ ଚଢ଼ାଦାମରେ ମିଳିଲା ।
ପାଠକେ! ଆପଣ ଜାଣିଥିବେ ଅକ୍ଟୋବର ମାସଟା ୧୯୯୯ ମସିହା ପରେ ଓଡ଼ିଶା ପାଇଁ ଗୋଟେ ଭୟଙ୍କର ମାସ ହୋଇଗଲା । ଏହାକୁ ଅନେକ ବାତ୍ୟାମାସ ବୋଲି ମଧ୍ୟ କହନ୍ତି କାରଣ ୧୯୯୯ ଅକ୍ଟୋବର ମାସ ୨୯ ତାରିଖରେ ଓଡ଼ିଶା ଉପକୂଳରେ କୋଟିଏ ଭୀଷଣ ସାମୁଦ୍ରିକ ବାତ୍ୟା ହୋଇଥିଲା ଯାହା ‘ମହାବାତ୍ୟା’ ନାମରେ ଆଜିବି ସମସ୍ତଙ୍କ ମନରେ ଅଛି ଓ ଏହି ସମୟ ଆସିଗଲେ ଓଡ଼ିଆଙ୍କ ମନରେ ନିଶ୍ଚିତ ଭୟ ସୃଷ୍ଟି କରୁଛି । ଏହି ଖଣ୍ଡପ୍ରଳୟରେ ପାଖାପାଖି ଦଶହଜାରରୁ ଅଧିକ ଲୋକ ମରି ଯାଇଥିଲେ । ଗାଈ, ଗୋରୁ, କୁକୁର ତ ନିଶ୍ଚିହ୍ନ ହୋଇଯାଇଥିଲେ । ଏପରିକି ଶାଗୁଣା ବଂଶ ମଧ୍ୟ ଲୋପ ପାଇଯାଇଥିଲା । ଆମେ ସମସ୍ତେ ଜାଣିଛେ ଯେ ଏହା ନିଶ୍ଚିତ ଭାବରେ ମାନବସମାଜ ଉପରକୁ ଆସିଥିବା ଅତି ଭୟଙ୍କର ବିପତ୍ତି ଥିଲା । ଯାହାର ଫାଇଦା ଆଜି ୨୦୨୫ରେ ମଧ୍ୟ ଏଇ ଛୋଟ ଛୋଟ ଟିଭି ଘୋଷକମାନେ ଉଠାଉଛନ୍ତି । ପାଠକେ! ସମୁଦ୍ରରେ ପ୍ରତିଦିନ ଛୋଟମୋଟ ଲଘୁଚାପ ସୃଷ୍ଟି ହେଉଛନ୍ତି । ସେ ସମସ୍ତେ ଭୀଷଣ ବାତ୍ୟାରେ ପରିଣତ ହୋଇ ଯାଉନାହାନ୍ତି । କିନ୍ତୁ କିଛି ଲୋକ ସମୁଦ୍ରରେ ସୃଷ୍ଟି ହୋଇ ଭୂମି ଆଡ଼କୁ ଅଗ୍ରସର ହେଉଥିବା ଲଘୁଚାପକୁ ଏକ ଭିନ୍ନ ରୂପ ଯେପରିକି ଭୀଷଣ ବାତ୍ୟା, ଭୟଙ୍କର ବାତ୍ୟା, ବିକଟାଳ ରୂପ ଧରି ମାଡ଼ି ଆସୁଥିବା ବାତ୍ୟା ଆଦି ନାଁ ଦେଇ ମିଛରେ ଲୋକଙ୍କୁ ଡରାଇବାରେ ଲାଗି ପଡ଼ୁଛନ୍ତି । ଏପରି କରିବା ପଛରେ ଦୁଇଟି ଅମାନବୀୟ କାରଣ ଥାଏ । ଗୋଟିଏ ହେଲା ନିଜ ଛୋଟମୋଟ ଚ୍ୟାନେଲର ଦର୍ଶକସଂଖ୍ୟା ଅଧିକ କରିବା । ଦ୍ୱିତୀୟ ହେଉଛି ବଜାରରୁ ସବୁ ଅତ୍ୟାବଶ୍ୟକ ସାମଗ୍ରୀ ଲୁଚାଇ ଦେଇ ଲୋକଙ୍କୁ ସେହି ସାମଗ୍ରୀକୁ କେତେଗୁଣ ଉଚ୍ଚା ଦରରେ ବିକ୍ରୀ କରି ମୁନାଫା କମାଇବା ।
ଏଇଥରର ‘ମନ-ଥା’ କଥାକୁ ନିଅନ୍ତୁ । ସାଧାରଣ ବାତ୍ୟାଟିଏ ବଙ୍ଗୋପସାଗରରେ ସୃଷ୍ଟି ହୋଇ ଆନ୍ଧ୍ରପ୍ରଦେଶରେ ଭୂ-ସ୍ପର୍ଶ କଲା । ଓଡ଼ିଶାରେ ଏହାର ମୋଟେ ଚିହ୍ନବର୍ଣ୍ଣ ନଥିଲା । ତଥାପି ଚିକ୍ରାର ଚାଲିଲା । ଓଡ଼ିଶାରେ କେବଳ ବର୍ଷା ହେବା ବ୍ୟତୀତ ବାତ୍ୟାର କିଛି ବି ପ୍ରଭାବ ପଡ଼ିଲା କି? ଟିଭି ଲୋକଙ୍କ କଥାରେ ସରକାରଙ୍କର ପୂର୍ବ ପ୍ରସ୍ତୁତି ନାଁଆରେ ସମୟ, ଶକ୍ତି ଓ ଅର୍ଥ ନଷ୍ଟହେଲା ଯାହାକି ଲୋକଙ୍କର କଷ୍ଟଲବ୍ଧ ପଇସା ଥିଲା ଓ ଅଯଥାରେ ନଷ୍ଟ କରାଗଲା । ଅବଶ୍ୟ ରିଲିଫ୍ ଦାୟିତ୍ୱରେ ରହିବା ବାବୁମାନଙ୍କର ପୁଷମାସ ହୋଇଗଲା । ଜଣେ ସରକାରୀ ବାବୁ କହିଲେ – “ଆଉ ଉପାୟ କ’ଣ ଥିଲା? ନ କରିଥିଲେ ଯଦି ବାତ୍ୟା ଆସିଥାଆନ୍ତା ତେବେ ଆପଣମାନେ ଓ ଏଇ ଲୋକେ କହିଥାଆନ୍ତେ ସରକାର ସଠିକ୍ ପ୍ରସ୍ତୁତି କଲେ ନାହିଁ । ତେଣୁ ବାତ୍ୟାଯୋଗୁଁ ରାଜ୍ୟର କ୍ଷତି ହୋଇଗଲା । ଆପଣମାନେ ମୂଳରୁ ଡ୍ୟାସ ନଥାଇ ଯେମିତି ଡ୍ୟାସ ଡ୍ୟାସ ଚିକ୍ରାର କରୁଛନ୍ତି ସେଥିରେ ସରକାର ମଧ୍ୟ ଅଯଥାରେ ଲୋକଙ୍କ ପଇସା ନଷ୍ଟ କରୁଛି । ଆଉ ଉପାୟ କ’ଣ?”
ଆମର କିଛି କହିବାକୁ ନଥିଲା । ଆମେ କେବଳ ଭାବୁଥିଲୁ ଏ ଚାଇନା ମେସିନର ଚିକ୍ରାରକୁ କେମିତି ହେଉ ବନ୍ଦ କରାଯିବା ଦରକାର ।
ଏଇ ହେଉଛି ବିକାଶ !
ପୁଲିସ କରିବ କ’ଣ ?
ସୁରେନ୍ଦ୍ର ପାତ୍ର (ବରିଷ୍ଠ ସାମ୍ବାଦିକ)
Comments
0 comments
