ଦି କୋଟିଆ ଭକ୍ତି

ପାଠକେ! ଇଏ ଏଇ ପକ୍ଷର ଘଟଣା । ମୁଁ ଆଉ ମଳିକବାବୁ ବୋଲବମ ଭକ୍ତଙ୍କ ଉପରେ ତଥ୍ୟସଂଗ୍ରହ କରିବାକୁ ଶ୍ରାବଣ ମାସର ଦ୍ୱିତୀୟ ସୋମବାର ଦିନ କଟକ ବାହାରିଥିଲୁ । କଟକ ଯିବାକୁ ଦୁଇଟି ରାସ୍ତା- ଗୋଟିଏ ଜାତୀୟ ରାଜପଥ ଆରଟି ତ୍ରିଶୁଳିଆ-ବାରଙ୍ଗ ପଥ । ସମୟ ଦିନ ୧୦ଟା ପାରି ହେଲାଣି । ଟ୍ରାଫିକବାଲାଙ୍କଠାରୁ ଜାଣିଲି ଯେ ବାରଙ୍ଗ ତ୍ରିଶୂଳିଆ ବାଟ ପ୍ରବଳ ଭିଡ଼ । ବିଶେଷକରି ତ୍ରିଶୂଳିଆ ପୋଲଉପରେ ବୋଲବମ ଭକ୍ତ ଓ ଗାଡିମୋଟରକୁ ନେଇ ଏପରି ଭିଡ଼ ହୋଇଛି ଯେ ଯିବାଆସିବା କଷ୍ଟକର । ମଳିକବାବୁ କହିଲେ ଖାଲି କ’ଣ ପୋଲ, ସେ ରାସ୍ତାଟାଯାକ ଭିଡ଼ । ଆମେ ଯୋଜନା କରିଥିଲୁ ଯେ ଜାତୀୟ ରାଜପଥରେ ଚାଲିବା । ଏଠାରେ ଉପରେ ଫ୍ଲାଇଓଭର ଅଛି । ତଳେ ବୋଲବମ ଭକ୍ତମାନେ ଯାଉଥିବେ । ହେଲେ ସେଦିନ କୁଆଡ଼େ ଯିବୁ ଆଜ୍ଞା? ରସୁଲଗଡ଼ ପାଖରେ ଦେଖିଲୁ ପୁରା ଛକଟା ଭର୍ତ୍ତି ହୋଇ ଯାଇଛି । ଭକ୍ତମାନେ କଟକ ଗଡ଼ଗଡ଼ିଆ ଘାଟରୁ ପାଣି ଉଠାଇ ଲିଙ୍ଗରାଜଙ୍କ ଜଳାଭିଷେକ କରିବାକୁ ଯାଉଛନ୍ତି । ମଳିକବାବୁ ବୁଦ୍ଧି ଦେଇଥିଲେ ମୋଟେ ପିଚୁ ରାସ୍ତାକୁ ଉଠନ୍ତୁ ନାହିଁ । ପୁରା ନାଲି ରାସ୍ତା ଉପରେ ଚାଲନ୍ତୁ । ହେଲେ ଯିବୁ କୁଆଡ଼େ? ସମସ୍ତେ ଏଇ ଭକ୍ତଙ୍କୁ କାଟିବା ପାଇଁ ଭୁଲ ରାସ୍ତାରେ ମାନେ ଡାହାଣପଟେ ମାଡ଼ି ଆସୁଥିଲେ । ସାରା ରାସ୍ତାଟି ସେତେବେଳକୁ ଗଞ୍ଜେଇ ବାସ୍ନାରେ ନିଶାଗ୍ରସ୍ତ । ଠାଏ ଠାଏ ଧୂଆଁ ସବୁ କୁଣ୍ଡଳୀମାରି ଉପରକୁ ଉଠୁଥିବାର ପବିତ୍ର ଦୃଶ୍ୟକୁ ଦେଖି ହେଉଥାଏ । କାରଣ ରାସ୍ତାକଡ଼ରେ ଚିଲମମାଡ ସାଙ୍ଗକୁ କିଛି କିଛି ସ୍ଥାନରେ ବିୟର ସେବା ଖୁଲ୍ଲମଖୁଲ୍ଲା ଚାଲିଥାଏ । କିଛି ସ୍ଥାନରେ ଭିଡ଼ ପ୍ରବଳ ହେଉଥାଏ । କାରଣ ବୁଝିଲୁ ସେଠାରେ ଧାର୍ମିକ ମାରୱାଡି ଓ ଅନ୍ୟମାନଙ୍କ ପକ୍ଷରୁ ବୋଲବମ ସେବା ସଂସ୍ଥାନ ଶିବିରମାନ କରାଯାଇ ଭକ୍ତମାନଙ୍କ ପାଇଁ ଖାଦ୍ୟ ପାନୀୟର ବ୍ୟବସ୍ଥା କରାଯାଇଥାଏ । ବାହୁଙ୍ଗିମାନଙ୍କୁ ରଖିବାପାଇଁ ଲମ୍ବା ଭାଡ଼ିି ବ୍ୟବସ୍ଥା କରାଯାଇଥାଏ । ଗାଧୋଇବାକୁ ପାଇପରେ ପାଣି ଯୋଗାଇ ଦିଆଯାଉଥାଏ । ତେଣୁ ସେଠାରେ ରାସ୍ତା ପୁରା ଜାମ୍ । ଆମ୍ବୁଲାନ୍ସ ବି ଯାଇ ପାରୁନଥାନ୍ତି । ଜଣେ ଜଣେ ପୁଲିସ ଦେଖା ଯାଉଥାଆନ୍ତି କିନ୍ତୁ ଲାଗୁଥାଏ ସେମାନେ ଭିଡ଼କୁ ନୁହନ୍ତି । ଲୋକଙ୍କୁ ଦେଖି ଭକ୍ତିରେ ଗଦଗଦ ହେବା କଥା । ପରେ ଜଣେ ଟ୍ରାଫିକ ଅଫିସର କହିଲେ ସିଏ ସେଠି କଣଟା କରିବେ? କାହାରି ଦେହରେ ଯଦି ତାଙ୍କ ବାଡ଼ିଟା ଭୁଲରେ ବାଜିଗଲା ତେବେ ଅବସ୍ଥା ସଙ୍ଗିନ୍ ହୋଇଯିବ । ପାଠକେ! ସେଦିନ ଆମେ ସକାଳ ୧୦ଟାରୁ ଭୁବନେଶ୍ୱରରୁ ବାହାରି କଟକରେ ପହଂଚିଲା ବେଳକୁ ଦିନ ୪ଟା ହୋଇଗଲା ।

ବାଟରେ ଖବର ମିଳିଲା ଯେ ବରଗଡ଼ ଜିଲ୍ଲାର ପାଇକମାଳ ଅଂଚଳରେ ପୌରାଣିକ ଗନ୍ଧମାର୍ଦ୍ଦନ ପର୍ବତରୁ ବାହାରୁଥିବା କପିଳଧାର ଜଳପ୍ରପାତରେ ଗାଧୋଉଥିବା ବେଳେ ୧୭ଜଣ ବୋଲବମଭକ୍ତ କୁଆଡ଼େ ହଜିଗଲେ । ସେମାନେ ସବୁ ଛତିଶଗଡ଼ ରାଜ୍ୟରୁ ପ୍ରସିଦ୍ଧ ହରିଶଙ୍କର ଓ ନୃସିଂହନାଥଙ୍କ ଉପରେ ଜଳାଭିଷେକ ପାଇଁ ଆସିଥିଲେ । ସେଥିରେ ବୁଢ଼ାବୁଢ଼ୀ ସମସ୍ତେ ଥିଲେ । କୁଆଡ଼େ ହଜିଗଲେ । ୧୫ଘଂଟା ଧରି ବରଗଡ, ବଲାଙ୍ଗୀରର ପୁଲିସ, ଅଗ୍ନିଶମ ଓ ଅନ୍ୟାନ୍ୟମାନେ ଖୋଜାଲୋଡା କରି ସେମାନଙ୍କୁ ଉଦ୍ଧାର କରିଥିଲେ । ସେମାନେ ପାଣି ଢାଳିବା କଥା ଭୁଲି ଘରକୁ ପଳେଇଥିଲେ ।

କେନ୍ଦୁଝର ଜିଲ୍ଲାରେ ଯୋଡ଼ା ଖଣି ଅଂଚଳରେ ଏକ ଦୁର୍ଘଟଣାରେ ୨ ଜଣ ବୋଲବମ୍ ଭକ୍ତ ପ୍ରାଣ ହରାଇଲେ । ଏମାନେ ସବୁ ରାଉରକେଲା ସେକ୍ଟର ୨ର ଲୋକ । ସେମାନେ କେନ୍ଦୁଝରର ମୁର୍ଗା ମହାଦେବ ମନ୍ଦିରକୁ ପାଣି ଢାଳିବା ପାଇଁ ଯାଉଥିଲେ । ବାଟରେ ଏହି ଦୁର୍ଘଟଣାରେ ପଡ଼ିଥିଲେ । ପାଖାପାଖି ଅଧଡର୍ଜନ ଭକ୍ତ ଆହତ ହୋଇଥିଲେ ।

ପାଠକେ! ଶୁଣିଲୁ ଏଥିପାଇଁ ପୁରୀର ପ୍ରସିଦ୍ଧ ଲୋକନାଥଙ୍କ ମନ୍ଦିରରେ ୫୦ହଜାର ଭକ୍ତ ଏକାଠି ହୋଇଥିଲେ । ସବୁସ୍ଥାନରେ ଧବଳେଶ୍ୱର, ଆରଡି, ଲଡୁବାବା, ଲୋକନାଥଙ୍କଠୁ ନେଇ ଭୁବନେଶ୍ୱରର ପ୍ରଭୁ ଲିଙ୍ଗରାଜଙ୍କ ପର୍ଯ୍ୟନ୍ତ ପ୍ରାୟ ଅଧିକାଂଶ ସ୍ଥାନରେ ଶିବଭକ୍ତମାନଙ୍କୁ ବିଭିନ୍ନ ସ୍ଥାନରୁ ବହୁକଷ୍ଟରେ ଚାଲି ଚାଲି ଆସି ଜଳାଭିଷେକ କରୁଥିବାର ଦେଖିବାକୁ ମିଳିଥିଲା । ଏତେ ଖରାରେ ପିଚୁ ସଡ଼କ ଉପରେ ଖାଲି ପାଦରେ ଯାତ୍ରା କରି ବିଭିନ୍ନ ଶୈବପୀଠରେ ପହଂଚିବା ନିଶ୍ଚିତ ଏକ କଷ୍ଟକର କଥା ଥିଲା ।

ହେଲେ ଏଥିପାଇଁ କଷ୍ଟ କେବଳ ଭକ୍ତମାନେ ଉଠାଉଥିଲେ ବୋଲି ନୁହେଁ । ସାଧାରଣ ଲୋକଙ୍କୁ ଏଥିପାଇଁ କମ୍ କଷ୍ଟ ଉଠାଇବାକୁ ପଡ଼ୁ ନଥିଲା । ଏହି କଷ୍ଟ ଉଠାଉଥିବା ଲୋକଙ୍କ ମଧ୍ୟରେ ରାଜ୍ୟଯାକର ବିଭିନ୍ନ ରାସ୍ତାକଡ଼ର ଗ୍ରାମବାସୀଙ୍କଠାରୁ ନେଇ ରାଷ୍ଟ୍ରୀୟ ରାଜପଥ, ରାଜ୍ୟ ରାଜପଥଠାରୁ ନେଇ ବିଭିନ୍ନ ଜନପଥରେ ସରକାରୀ, ବେସରକାରୀ ଗାଡ଼ିମଟରରେ ଯାତ୍ରା କରୁଥିବା ଯାତ୍ରୀ, ଏପରିକି ଆମ୍ବୁଲାନ୍ସରେ ଯାଉଥିବା ଯାତ୍ରୀମାନେ ମଧ୍ୟ ସୁରୁଖୁରୁରେ ଯାତ୍ରା କରିପାରୁ ନଥିଲେ କାରଣ ବୋଲବମ୍ ଭକ୍ତମାନେ ରାସ୍ତାଗୁଡ଼ିକର ଅଧାରୁ ଅଧିକକୁ ଅକ୍ତିଆର କରି ନେଉଛନ୍ତି । ପଛରୁ ଆଗରୁ ଆସୁଥିବା ଗାଡି ମୋଟର ହର୍ଣ୍ଣ ମାରିଲେ ଭକ୍ତମାନେ ଓଲଟା ସେମାନଙ୍କୁ ହାତ ଦେଖେଇ ଟିକେ ଅଟକିଯିବାକୁ କହୁଛନ୍ତି ।

ସେଦିନ ପାହାଳ ରସଗୋଲା ବଜାର ପାଖରେ ରାସ୍ତାକଡ଼ରେ ଜଣେ ଜଟା ଓ ପାଚିଲା ଦାଢ଼ିଥିବା ଏକ ବିଶାଳ ଚିଲମହସ୍ତ ବାବା ବସି ଗଞ୍ଜେଇ ସେବା କରୁଥିବାବେଳେ ଟିକେ ଅଟକିଗଲୁ । ଜାଣିଲୁ ବାବା ଚଣ୍ଡିଖୋଲ ପାଖ ବିନାୟକ ମନ୍ଦିରରୁ ଆସିଛନ୍ତି । ଆମେ ପଚାରିଲୁ ଏ ଯାତ୍ରା କ’ଣ ପାଇଁ ହେଉଛି? ବାବା କହିଥିଲେ ଭୋଲେବାବାଙ୍କ ଇଚ୍ଛା । ଆମେ କହିଲୁ ରାସ୍ତା ବନ୍ଦକରି ଗଞ୍ଜେଇ ଟାଣିବାଟା କ’ଣ ଭୋଲେବାବାଙ୍କ ଇଚ୍ଛା? ବାବା କହିଲେ ତମେ ସେସବୁ ବୁଝି ପାରିବନି ।

ତେବେ ପାଠକେ ଆମେ ପୁରାଣ ପଢ଼ି ଯେତିକି ବୁଝିଛୁ ଯେତେବେଳେ ରାକ୍ଷସ ଓ ଦେବତାମାନେ ବାସୁକୀ ନାଗକୁ ପାହାଡ଼ରେ ଗୁଡ଼େଇ ସମୁଦ୍ର ମନ୍ଥନ କଲେ ସେତେବେଳେ ନୀଳ ନୀଳରଙ୍ଗର ଗରଳ ବାହାରିଥିଲା । ତାକୁ କାଳେ ଦେବତାମାନେ ପିଇକି ମରିଯିବେ, ସେଥିପାଇଁ ଦେବ ଦେବ ମହାଦେବ ନିଜେ ସେ ଗରଳ ପାନ କରିଥିଲେ । ଯା ଫଳରେ ତାଙ୍କ ଗଳା ନୀଳ ହୋଇଗଲା ଓ ଶରୀର ଉତ୍ତପ୍ତ ହୋଇଗଲା । ତେଣୁ ମହାଦେବଙ୍କ ଶରୀରକୁ ଥଣ୍ଡା କରିବାପାଇଁ ଦେବତା ଓ ଅନ୍ୟମାନେ କାଳେ ପବିତ୍ର ଗଙ୍ଗାଜଳରେ ଦେବଦେବଙ୍କୁ ଜଳାଭିଷେକ କରାଇଥିଲେ, ପ୍ରଚୁର ପରିମାଣରେ ବେଲପତ୍ର ଖୁଆଇଥିଲେ । ସେହି କଥାର ସ୍ମୃତିଚିହ୍ନ ରୂପେ କିଛି ପୁରୁଣାକାଳିଆ ଲୋକ ଶ୍ରାବଣମାସରେ ଶୁଦ୍ଧପୁତ ହୋଇ ପବିତ୍ର ଜଳରେ ଶିବଙ୍କର ଜଳାଭିଷେକ କରାଉଥିଲେ ।

ଜଣେ ବରିଷ୍ଠ ପୁଲିସ ଅଧିକାରୀ କହିଲେ ଏବେ ଏଇଟା ଏକ ବେପାର ଓ ଫେସନ ପାଲଟି ଯାଇଛି । ବେପାରୀମାନେ ଏହାର ନା ଦେଲେଣି କାମ୍ବଡ଼ ସେବା । ଆଗରୁ ମାଟିଘଡ଼ାରେ ପବିତ୍ରଜଳ ଭର୍ତ୍ତିକରି ନିଆଯାଇଥିଲା । ଏବେତ ଜଳ ଯାହା ପବିତ୍ର ସମସ୍ତେ ଜାଣିଛନ୍ତି, ତାକୁ ପୁଣି ଦାମିକା ପିତଳ, ଫେସନେବଲ ପ୍ଲାଷ୍ଟିକ ଘଡ଼ାରେ ନିଆଯାଉଛି । ଆଗେ ବାଉଁଶର ବାହୁଙ୍ଗି ଥିଲା ଏବେ ଇଲେକ୍ଟ୍ରୋନିକ ବାହୁଙ୍ଗି ବିକ୍ରୀ ହେଲାଣି ଯେଉଁଥିରେ ରଙ୍ଗବେରଙ୍ଗର ଲାଇଟ ଜଳୁଛି ଓ ଗୀତ ବି ବାଜୁଛି । ଏଥିପାଇଁ କେବଳ ଉପକୂଳରେ ୨କୋଟି ଟଙ୍କାର ବ୍ୟବସାୟ ହେଉଛି ବୋଲି ଆକଳନ କରାଯାଉଛି । ଏଥିରେ ଅନେକ ଅପରାଧିକ ଘଟଣା ସଂଘଟିତ ହେଉଛିି ଯେପରିକି ଗଞ୍ଜେଇ, ଡ୍ରଗ୍ସ ସରବରାହ ତଥା ସଙ୍ଗୀନ ଅପରାଧ । ଏବେ ଅନେକ ଯୁବତୀ, ମହିଳା ଏହି ଯାତ୍ରାରେ ଯାଉଛନ୍ତି ଓ ଫେରିବା ପରେ ସେମାନଙ୍କ ସହିତ ଖରାପ ବ୍ୟବହାର ହୋଇଥିବାର ଅଭିଯୋଗ କରୁଛନ୍ତି । ଧର୍ମ କଥା, କ’ଣ କରିହେବ?

ଆମେ କହିଥିଲୁ ହେବ ନା । ସେମାନଙ୍କୁ ଗୋଟିଏ ଲାଇନରେ ଚାଲିବାକୁ ଦିଅନ୍ତୁ ଏବଂ ବାଟଯାକ ପୋଲିସ ଜଗନ୍ତୁ । ଚେକ କରନ୍ତୁ ।

ଆମେରିକାର ରାଷ୍ଟ୍ରପତି କ’ଣ ତମ ଭୋଟର କି?

ଦିନେ ଆମ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କୁ ନିଜର ଅତି ଭଲ ବନ୍ଧୁ ବୋଲି କହୁଥିଲେ । ଖାଲି କହୁଥିଲେ ବୋଲି ନୁହେଁ, ଲୋକେ ଦେଖିଛନ୍ତି ତାଙ୍କୁ ବହୁ ସମୟଧରି କୁଣ୍ଢେଇ ଧରୁଥିଲେ । ଟ୍ରମ୍ପ ଆସିବେ ବୋଲି ଭାରତର ଗରିବ ଳୋକଗୁଡ଼ାଙ୍କୁ ନେଳିଆ କପଡ଼ା ଦେଇ, ପାଚେରୀ ଉଠାଇ ଲୁଚେଇ ପକାଉଥିଲେ । ଏବେ ସେହି ଟ୍ରମ୍ପ କହିଲେଣି ଭାରତଟା ଗୋଟା ମୃତ ଅର୍ଥନୀତି । କେବଳ ସେତିକି କହିଛନ୍ତି ବୋଲି ନୁହେଁ ଭାରତ ଉପରେ ୨୫% ଟାରିଫ (ମାନେ ଅତିରିକ୍ତ କର) ଲଗାଇ ତା ଉପରେ ୧୦% ଫାଇନ ଲଗାଇ ଦେଲେଣି । ଆଗରୁ କହିଥିଲେ ୩୦ଜୁଲାଇରୁ ଅଗଷ୍ଟ ୧ତାରିଖରୁ ଏହି ଟାରିଫ୍ ଲାଗିବ ଏବେ ଦୟାକରି ଗୋଟିଏ ସପ୍ତାହ ଘୁଂଚେଇଛନ୍ତି । ୭ଅଗଷ୍ଟରୁ ଲଗେଇବେ । ଆଜ୍ଞା! ବନ୍ଧୁଙ୍କ ଅନୁଯାୟୀ ଚାରିପଟରେ ଥିବା ଦେଶଙ୍କ ଅପେକ୍ଷା ଭାରତ ଅଧିକ ଟାରିଫ ଦେବ । ପାକିସ୍ତାନ ୧୯ %, ଆଫଗାନିସ୍ତାନ ୧୫ %, ବାଂଲାଦେଶ ୨୦% ଟାରିଫ ଦେବେ । ଭାରତ ୨୫% ଦେବ ।

ଏବେ ମୋଦୀ ସରକାରର ଲୋକମାନେ ଏଥିରୁ ବଂଚିବା ପାଇଁ ଦୁଇ ପ୍ରକାର ବାଟ କରିଛନ୍ତି । ଗୋଟିଏ ହେଉଛି ଟ୍ରମ୍ପଙ୍କୁ ଛାଡ଼ି ରାହୁଲ ଗାନ୍ଧୀଙ୍କୁ ଗାଳି ଦେଉଛନ୍ତି । ଲୋକ ଶୁଣିଲେ ଯେ ଟ୍ରମ୍ପ ଭାରତକୁ ମୃତ ଅର୍ଥନୀତି ବୋଲି କହିଲେ, ହେଲେ ବିଜେପି ନେତାମାନେ ସେମାନଙ୍କ ଜଣମାଧ୍ୟମ ଜରିଆରେ ପ୍ରଚାର କରୁଛନ୍ତି ଯେ ଏକଥା ରାହୁଲ ଗାନ୍ଧୀ କହୁଛନ୍ତି । ହସିବେ ନା କାନ୍ଦିବେ? ଦ୍ୱିତୀୟରେ ମୋଦୀଙ୍କ କିଛି ବିଜେପି ଅର୍ଥନୀତିଜ୍ଞ କହୁଛନ୍ତି ଟ୍ରମ୍ପ ଟାରିଫ ଭୟଦେଖାଇ ବିଭିନ୍ନ ଦେଶଉପରେ ଚାପ ପକାଉଛନ୍ତି ଯେପରି ସେମାନଙ୍କ ସହିତ ଆମେରିକା ତାକୁ ସୁହାଇବା ଭଳି ବାଣିଜ୍ୟ ରାଜିନାମା ହାସଲ କରିନେବ । ମୋଦୀଙ୍କ ଯୋଗୁ ଭାରତ ସହ ଏହି ଅନ୍ୟାୟପୂର୍ଣ୍ଣ ରାଜିନାମା କରିନେବାରେ ଟ୍ରମ୍ପ ସଫଳ ହୋଇ ପାରୁ ନାହାନ୍ତି । ତେଣୁ ଭାରତ ଉପରେ ଚାପ ପକାଉଛନ୍ତି ଓ କ’ଣ କ’ଣ ସବୁ କହୁଛନ୍ତି ।

ଏବେ ମୋଦୀ କହୁଛନ୍ତି – ହଉ ରହରେ ଟ୍ରମ୍ପ, ତୋ’ଠୁ ଆମେ ଏଫ୍-୩୫ ଲଢୁଆ ବିମାନ କିଣିବୁ ନାହିଁ । ପାଠକେ! ମୋଦୀ ଗତ ଫେବୃଆରୀରେ ଯେତେବେଳେ ଆମେରିକା ଯାଇଥିଲେ ସେତେବେଳେ ଟ୍ରମ୍ପ ଭାରତକୁ ଏହି ମହଙ୍ଗା ଯୁଦ୍ଧବିମାନ କିଣିବାକୁ ପ୍ରସ୍ତାବ ଦେଲାକ୍ଷଣି ମୋଦୀ ରାଜି ହୋଇଯାଇ ଥିଲେ । ହେଲେ ମୋଦୀ ବୁଝୁନାହାନ୍ତି ଯେ ଏହି ନୂଆ ଟାରିଫ ବ୍ୟବସ୍ଥା ଯୋଗୁ ଭାରତର ୮୭ବିଲିଅନ ଡଲାରର ରପ୍ତାନୀ ପ୍ରଭାବିତ ହେବ । ସେତିକି ନୁହେଁ ଟ୍ରମ୍ପବାବୁ ଧମକାଇଲେଣି ଯଦି ଇରାନ ବା ରୁଷରୁ ଭାରତ ତେଲ କିଣିବ, ତେବେ ଭାରତ ଉପରେ ସିଏ ଫାଇନ୍ ଲଗେଇବେ । ଯାହାକୁ ଦେଖି ମୋଦୀବାବୁ ରୁଷରୁ ତେଲ କିଣିବା ବାତିଲ କରିବେ ବୋଲିି କହିଲେଣି । ସେତିକି ନୁହେଁ ଟ୍ରମ୍ପ ଭାରତର ୬ଟି ପେଟ୍ରୋଲିୟମ କମ୍ପାନୀ ଉପରେ ବ୍ୟାନ୍ ଲଗାଇଦେଲେଣି । ଏବେ ମୋଦୀ କହୁଛନ୍ତି ଭାରତ ବାଣିଜ୍ୟ ଚୁକ୍ତିକୁ ନେଇ ଆମେରିକା ସହିତ ଆଲୋଚନା କରିବ । ହେଲେ ସେତେବେଳେ ଚାଷୀ, ଉଦ୍ୟୋଗୀ ଏବଂ ଏମ୍ଏସ୍ଏମ୍ଇଙ୍କ ସ୍ୱାର୍ଥ ଉପରେ ମଧ୍ୟ ଜୋର ଦେବ ।

କଥାହେଉଛି ମୋଦୀ ବା ତାଙ୍କଲୋକ ଯେତେ ମିଛ କୁହନ୍ତୁ ନା କାହିଁଁକି ଭାରତର ଅର୍ଥନୀତି କେତେ ପରିମାଣରେ ଆଗେଇଛି । ବିଜେପିର ଅର୍ଥନୀତିଜ୍ଞ ବୋଲାଉଥିବା ଲୋକମାନେ କହୁଛନ୍ତି ଯେ ଏବର୍ଷ ଭାରତର ବୃଦ୍ଧି ଦର ୬.୫% ରହିବ । ଦେଶର ଅର୍ଥନୈତିକ ବୃଦ୍ଧି ଦର ଅକ୍ଟୋବରରୁ ଡିସେମ୍ବର ୨୦୨୪ ଭିତରେ କେତେ ଥିଲା? ସେହିମାନେ କହୁଛନ୍ତି ଯେ ଏହା ୬.୨% ମାତ୍ର ଥିଲା । ଅଥଚ ବର୍ଷେ ପୂର୍ବରୁ ଏହି ଅବଧିରେ ଏହି ଦର ୯.୫ % ଥିଲା । ଏବର୍ଷ ଏତେ କାହିଁ କମିଗଲା? କିଛି ଜାଣିବା ଶୁଣିବା ବିଶେଷଜ୍ଞ ଯାହା କହୁଛନ୍ତି ଯେ ଗତବର୍ଷ ନିର୍ବାଚନ ଯୋଗୁ ଜାଣିଶୁଣି ଏହାକୁ ବଢ଼ାଇ ଚଢାଇ କୁହାଯାଇଥିଲା ହୁଏତ ସତ ହୋଇପାରେ ।

ପାଠକେ! ନେପାଳ ଗୋଟିଏ ଛୋଟିଆ ଦେଶ । ଲୋକସଂଖ୍ୟା କେତେ ଧରାଯାଉ ୩କୋଟି । ସେଠିକାର ବାର୍ଷିକ ବଜେଟ ହେଉଛି ୧.୮୬ ଲକ୍ଷ କୋଟି । କିନ୍ତୁ ସେଠାକାର ଲୋକଙ୍କର ମୁଣ୍ଡପିଛା ଆୟ ୧.୩୦ ଲକ୍ଷ ଟଙ୍କା । ଭାରତର ବଜେଟ ପାଖାପାଖି ୫୦ଲକ୍ଷ କୋଟି । ଲୋକସଂଖ୍ୟା ୧୪୨ କୋଟି ହେଲେ ମୁଣ୍ଡପିଛା ଆୟ କେତେ ୨ଲକ୍ଷ କି ସେହି ପାଖାପାଖି । ୧୪୨ କୋଟି ଲୋକ ଟ୍ୟାକ୍ସ ଦେଉଥିବାବେଳେ ଲୋକଙ୍କ ମୁଣ୍ଡପିଛା ଆୟ ମାତ୍ର ୨ ଲକ୍ଷ ଟଙ୍କା ଅଥଚ ଆଉ ଗୋଟିଏ ହିନ୍ଦୁ ରାଷ୍ଟ୍ରରେ ମାତ୍ର ୩ କୋଟି ଲୋକ ଟ୍ୟାକ୍ସ ଦେଇ ତାଙ୍କର ମୁଣ୍ଡ ପିଛା ଆୟ ୧.୩୦ ଲକ୍ଷ ଟଙ୍କା ହେଉଛି । ପୁଣି ସାଧାରଣ ଲୋକଙ୍କଠୁ ବିଭିନ୍ନ ବାଟରେ ପଇସା ଭିଡିବା ଓ କରପୋରେଟମାନଙ୍କୁ ପଇସା ଛାଡିବାରେ ଭାରତର ସରକାର ତାଙ୍କ ବ୍ୟାଙ୍କ ଟିକିଏ ବି ହେଳା କରୁ ନାହାନ୍ତି । ଏଇଟା କ’ଣ ସୁସ୍ଥ ଅର୍ଥନୀତି ।

ବୟସାଧିକ୍ୟ ଯୋଗୁ ମୋଦୀ ବାବୁ ଗୋଟିଏ କଥା ବୁଝୁନାହାନ୍ତି ଯେ ଭାରତରେ ସିନା ଭୋଟରଙ୍କୁ ନାଟକ କରି ମିଛ କହି ନହେଲେ ପୁଲିସ ଲଗାଇ ସେନା ଲଗାଇ ମାରିପିଟି ଭୋଟ ନେଇ ସରକାର କରିବ ହେଲେ ଆମେରିକା ରାଷ୍ଟ୍ରପତି କ’ଣ ଭାରତୀୟ ଭୋଟର? ତାଙ୍କ ସାଙ୍ଗରେ ଗେମ୍ ଖେଳିଲେ ହେବ କି?

ଗାଲୁଆଙ୍କ ୫୭ ବାଟି ଚାଷ!

ପାଠକେ! ଗତ ପକ୍ଷରେ ରାଜ୍ୟର କେତେଜଣ ଗାଲୁଆଲୋକ ରାଜ୍ୟ ମନ୍ତ୍ରିମଣ୍ଡଳ ପରିବର୍ତ୍ତନକୁ ନେଇ ଗୋଟା ସୁନାମୀ ବୁହାଇଦେଲେ । ବିଶେଷ କରି ଭୁବନେଶ୍ୱରର ଖଟି ଓ ରାଜ୍ୟର ସାମାଜିକ ଗଣମାଧ୍ୟମରେ ମନ୍ତ୍ରିମଣ୍ଡଳରେ ପରିବର୍ତ୍ତନ ହେବା କଥାଟି ଯେଉଁ ପରିମାଣରେ ପବନ କରାଇଲା, ଏପରି ପବନ ଆଗରୁ କେବେ ବୋହିଥିବା କଥା ଆମର ମନେ ପଡ଼ିଲା ନାହିଁ ।

ଆମ ପ୍ରାତଃଭ୍ରମଣ ଦଳର ମଳିକବାବୁ ସେଦିନ ପଚାରିିଲେ ଖବର ପାଇଛନ୍ତି ନା ନାହିଁ? ଆପଣ ତ ନିଶ୍ଚୟ ପାଇଥିବେ । ଆମେ ଯେତେବେଳେ ପଚାରିଲୁ କୋଉ ଖବର ମଳିକ ବାବୁ କହିଲେ କ’ଣ ଆଏ ଦିଲ୍ଲୀରେ ପରା ମନ୍ତ୍ରୀମଣ୍ଡଳ ବଦଳିବା ନିଷ୍ଟତ୍ତି ହୋଇଗଲାଣି । ସାମଲବାବୁ ମୁଖ୍ୟମନ୍ତ୍ରୀ ହେଉଛନ୍ତି, ଦିଲ୍ଲୀରୁ ଡକରା ଆସି ଯାଇଛି । ସିଏ ମନ୍ତ୍ରୀମଣ୍ଡଳ ତାଲିକା ଧରି ଦିଲ୍ଲୀ ଯାଇଛନ୍ତି ଫେରିଲେ ନୂଆ ମନ୍ତ୍ରୀମଣ୍ଡଳ ହେବ । ଏଥର ଆଉ ଉପମୁଖ୍ୟମନ୍ତ୍ରୀ ନାଇଁ । ଦି’ ଦି’ ଟା ଉପମୁଖ୍ୟମନ୍ତ୍ରୀ ହୋଇ ଗୋଟା ଧନ୍ଦା ଲଗେଇଛନ୍ତି । ଖାଲି ଲୋକଙ୍କ ପଇସା ନଷ୍ଟ । ତିନିଜଣ ମହିଳା ବି ମନ୍ତ୍ରୀ ହେବେ । ମଳିକବାବୁଙ୍କ କଥାକୁ ଧଡ଼ କିନା ବିରୋଧ କରିବା ଲୋକ ହେଉଛନ୍ତି ଆମ ଦଳର ବେହେରାବାବୁ । ସିଏ ମଳିକବାବୁଙ୍କ ମୁଁହପାଖକୁ ତାଙ୍କ ଡାହାଣ ହାତର ଆଙ୍ଗୁଠିଟା ବଢେଇ ଦେଇ କହିଲେ- ହଇଓ ! ଏବେ ପରା ସିଏ ସଭାପତି ହେଲେ ଫେଣି ତାଙ୍କୁ ମୁଖ୍ୟମନ୍ତ୍ରୀ କ’ଣ କରିବେ ? ସିଏ ପରା ବିଧାୟକଟିଏ ହୋଇ ନାହାନ୍ତି । ତମର ଗୋଟା ସବୁ କଥାରେ ଗାଲୁଆମୀ । ହେଲେ ମଳିକବାବୁ ଛାଡ଼ିବା ଲୋକ ନୁହନ୍ତି । ପୁରା ଆଗକୁ ଡେଇଁପଡ଼ି ଆମ ସମସ୍ତଙ୍କ ଚାଲିବା ବନ୍ଦ କରେଇ ଦେଇ ସିଏ ତାଙ୍କ ମୋବାଇଲଟାକୁ ଆମକୁ ଦେଖେଇ କହିଲେ- କ’ଣ ମୁଁ ଗାଲୁଆ ? ମୁଁ ଯଦି ଗାଲୁଆ ତେବେ ଏଇଟା କ’ଣ ? ଦେଖ ।

ଆମେ ଦେଖିଲୁ ତାଙ୍କ ମୋବାଇଲରେ ନିମ୍ନମତେ ଗୋଟାଏ ସମ୍ଭାବ୍ୟ ମନ୍ତ୍ରୀମଣ୍ଡଳର ତାଲିକା ପରିସ୍ଫୁଟିତ ହେଉଛି । ଆମେ ପଢିବା ପୂର୍ବରୁ ମଳିକବାବୁ ଖୁବ ଯୋରରେ ନିଜେ ପାଟି କରି ପଢି ପକାଇଲେ- ୧. ଜୟନାରାୟଣ ମିଶ୍ର-ପଂଚାୟତିରାଜ ଏବଂ ପାନୀୟଜଳ, ଗ୍ରାମୀଣ ବିକାଶ; ୨.ସିଦ୍ଧାନ୍ତ ମହାପାତ୍ର-ବାଣିଜ୍ୟ, ପରିବହନ, ଅବକାରୀ ମନ୍ତ୍ରଣାଳୟ; ୩.ବାବୁ ସିଂହ-ଖାଦ୍ୟ ଯୋଗାଣ, ଏବଂ ଗ୍ରାହକ କଲ୍ୟାଣ ମନ୍ତ୍ରା; ୪-ଲକ୍ଷ୍ମଣ ବାଗ-କୃଷି ଓ କୃଷକ ସଶକ୍ତିକରଣ ମନ୍ତ୍ରାଳୟ; ୫-ଦୁର୍ଗାପ୍ରସନ୍ନ ନାୟକ-ଉଚ୍ଚଶିକ୍ଷା; ୬-ଟଙ୍କଧର ତ୍ରିପାଠୀ-ସ୍କୁଲଏବଂ ଗଣଶିକ୍ଷା; ୭-ସୂର୍ଯ୍ୟବଂଶୀ ସୂରଜ-କ୍ରୀଡା, ଯୁବସେବା ଓ ଶକ୍ତି ମନ୍ତ୍ରୀ ହେବେ; ୮- ସନାତନ ବିଜୁଳୀ-ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା; ୯-କନକବର୍ଦ୍ଧନ ସିଂହଦେଓ-ରାଜସ୍ୱ ଓ ବିପର୍ଯ୍ୟୟ ପରିଚାଳନା ଏବଂ ଆଇନ ମନ୍ତ୍ରାଳୟ; ୧୦-ସୁରେଶ ପୂଜାରୀ -ଅର୍ଥ, ବିଜ୍ଞାନ ଓ ପ୍ରଯୁକ୍ତିବିଦ୍ୟା; ୧୧-ସମ୍ପଦ ସ୍ୱାଇଁ -ଦକ୍ଷତା ବିକାଶ ଏବଂ ବୈଷୟିକ ଶିକ୍ଷା,ଶିଳ୍ପ; ୧୨-ଇରାସିସ ଆଚାର୍ଯ୍ୟ-ମତ୍ସ୍ୟପାଳନ, ପ୍ରାଣୀସମ୍ପଦ ବିକାଶ, ସୂକ୍ଷ୍ମ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ; ୧୩-ଡକ୍ଟର କୃଷ୍ଣଚନ୍ଦ୍ର ମହାପାତ୍ର -ଇଲେକ୍ଟ୍ରୋନିକ୍ସ,ସୂଚନା ଓ ପ୍ରଯୁକ୍ତିବିଦ୍ୟା, ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ,ସଂସଦୀୟ ବ୍ୟାପାର; ୧୪- ପୃଥ୍ୱୀରାଜ ହରିଚନ୍ଦନ-ଗୃହନିର୍ମାଣ, ନଗର ଉନ୍ନୟନ, ସାର୍ବଜନୀନ ଉଦ୍ୟୋଗ; ୧୫-ସଂଜଳୀ ମୁର୍ମୁୁ- ଭିନ୍ନକ୍ଷମ ବ୍ୟକ୍ତିଙ୍କ ସାମାଜିକ ସୁରକ୍ଷା, ଓ ସଶକ୍ତିକରଣ, ଜନଜାତି ଓ ଅନୁସୂଚିତ ଜାତିବିକାଶ, ସଂଖ୍ୟାଲଘୁ, ଏବଂ ପଛୁଆବର୍ଗ କଲ୍ୟାଣ; ୧୬- ଗଣେଶ ରାମସିଂହ ଖୁଣ୍ଟିଆ-ଜଙ୍ଗଲ, ପରିବେଶ, ଓ ଜଳବାୟୁ ପରିବର୍ତ୍ତନ, ଶ୍ରମ ଓ କର୍ମଚାରୀଙ୍କ ରାଜ୍ୟ ବୀମା; ୧୭-ଗୋକୁଳାନନ୍ଦ ମଳ୍ଲିକ-ମତ୍ସ୍ୟ ଓ ପଶୁସମ୍ପଦ ବିକାଶ; ୧୮-ପ୍ରଭାତୀ ପରିଡ଼ା -ମିଶନ ଶକ୍ତିମହିଳା ଏବଂ ଶିଶୁ ବିକାଶ; ୧୯-ଅମର ନାୟକ-ପର୍ଯ୍ୟଟନ ଏବଂ ଇସ୍ପାତ ଓ ଖଣି; ୨୦-ଆଶ୍ରିତ ପଟ୍ଟନାୟକ- ସୂଚନା, ଲୋକସମ୍ପର୍କ, ଯୋଜନା ଏବଂ ଅଭିସରଣ ଏବଂ ଜଳସମ୍ପଦ । ଆମ ଚାଲିବା ଦଳର ବାଚସ୍ପତି ସେବାନିବୃତ୍ତ ପ୍ରଫେସର ନନ୍ଦ ବରାହୀ ସିଂହ କହିଲେ ହଇଓ ମଳିକେ! ଏଥିରେ ତ ମୂଳରୁ ମୁଖ୍ୟମନ୍ତ୍ରୀଙ୍କ ନାଁ ଟା ନାହିଁ । ଉପମୁଖ୍ୟମନ୍ତ୍ରୀ ନହେଲେ ନାହିଁ, ବିନା ମୁଖ୍ୟମନ୍ତ୍ରୀରେ କ’ଣ ମନ୍ତ୍ରିମଣ୍ଡଳ ଚାଲିବ? ଏ ପ୍ରଶ୍ନର ଉତ୍ତର ପାଇବାକୁ ଆମେ ସମସ୍ତେ ଯେତେବେଳେ ମଳିକବାବୁଙ୍କୁୁ ଚାହିଁଲୁ ମଳିକବାବୁ କହିଲେ- ହେ! ଆପଣମାନେ ଏତିକି ବୁଝୁନାହାନ୍ତି? ମୁଖ୍ୟମନ୍ତ୍ରୀ କ’ଣ ତାଙ୍କ ନିଜ ନାଁ’ଟା ଲେଖିବେ? ବେହେରା ବାବୁ ଦୀର୍ଘଭାବରେ ପଚାରିଲେ – ଆଉଉଉଉଉ? ମଳିକ ବାବୁ କହିଲେ ହେ! ସେଇଟା ମୋଦୀଜୀ ଲେଖିବେ ନା । ପାଠକେ! ଗାଲୁଆଙ୍କୁୁ ଆଉ ପାରିହବ ନାହିଁଁ । ନୂଆ ମନ୍ତ୍ରିମଣ୍ଡଳ ମୁଖ୍ୟମନ୍ତ୍ରୀ କି ବିନା ମୁଖ୍ୟମନ୍ତ୍ରୀରେ ହେଲା ଆମେ ଆଗାମୀ ସଂଖ୍ୟାରେ ଲେଖି ଜଣାଇବୁ । ଆପଣ ଧୈର୍ଯ୍ୟ ଧରନ୍ତୁ ।

ଓଡ଼ିଶା ପୁଣି ନମ୍ବର ୱାନ ଆଜ୍ଞା (ମେଲେରିଆରେ)

ଏବେ ଆଜ୍ଞା ଓଡ଼ିଶା ଫେଣି ନମ୍ବର ୱାନ୍ ହେଲା । କେଉଁଥିରେ କହିଲେ ମେଲେରିଆରେ । ଖାଲି ଏଇବର୍ଷ ବୋଲି ନୁହେଁ ମେଲେରିଆ ପ୍ରସାରଣରେ ଓଡ଼ିଶା ଗତ ତିନିବର୍ଷ ହେଲା ନମ୍ବର ୱାନ ହେଉଛି ଆଜ୍ଞା । ଆଉ ଖେଳ ନାଗିଛି ।

ଜାତୀୟ କୀଟବାହିତ ରୋଗ ନିୟନ୍ତ୍ରଣ କାର୍ଯ୍ୟକ୍ରମରୁ ଏହି ସୂଚନା ମିଳିଛି । ୨୦୨୧ରେ ୨୫୫୦୩ ଜଣ ଲୋକ ମେଲେରିଆରେ ଆକ୍ରାନ୍ତ ହେଲେ ସେଥିରୁ ୧୩ଜଣ ମରି ଯାଇଥିଲେ । ୨୦୨୨ରେ ୨୩୭୭୦ ଜଣ ଆକ୍ରାନ୍ତ ହେଲେ । ସେଥିରୁ ୫ ଜଣ ମରିଗଲେ । ୨୦୨୩ରେ ୪୧୯୭୩ ଜଣ ଆକ୍ରାନ୍ତ ହେଲେ, ୪ଜଣ ମରିଗଲେ । ୨୦୨୪ରେ ୭୮୬୯୩ ଜଣ ଆକ୍ରାନ୍ତ ହେଲେ, ୮ ଜଣ ମରିଗଲେ । ପୂର୍ବ ବର୍ଷଠୁ ୪ ଜଣ ଅଧିକା ମଲେ । ୨୦୨୫ମାନେ ଏଇବର୍ଷ ୨୪୪୭୨ ଜଣ ଆକ୍ରାନ୍ତ ହୋଇ ସାରିଲେଣି । ମରିବା ହିସାବଟା ଆସିନି । ଆସିଲେ ଆମେ ଏହି ଗର୍ବର କଥାଟା ଆପଣଙ୍କୁ ଜଣେଇଦେବୁ ।

ହେଲେ ବାବୁମାନେ ସଂଖ୍ୟା କମ କରିବା ପାଇଁ ଆମକୁ ଭୁଲ ହିସାବ ଦେଉଛନ୍ତି ବୋଲି କେତେକ ସ୍ୱାସ୍ଥ୍ୟବିଭାଗର ଅଧିକାରୀ କହୁଛନ୍ତି ଆଜ୍ଞା । ମ୍ୟାଲେରିଆ ନିୟନ୍ତ୍ରଣ କରିବାକୁ ବିଜେଡି ସରକାର ଗୋଟେ ଦମନ ଯୋଜନା ଆରମ୍ଭ କରିଥିଲେ । ଏବେ ଏହି ଯୋଜନାର ଅବଧିକୁ ଆଉ ୫ ବର୍ଷ ପାଇଁ ବଢାଇ ଦିଆଯାଇଛି । କିନ୍ତୁ ଏଥିରେ ଯେଉଁ ମ୍ୟାଲେରିଆ ରୋଗୀମାନଙ୍କର (୭୮ % ଲକ୍ଷଣ ବିହୀନ ଓ ମାତ୍ର ୨୨% ଲକ୍ଷଣଯୁକ୍ତ) ଚିହ୍ନଟ ହେଉଛି ସିଏ ସ୍ୱାସ୍ଥ୍ୟ ବିଭାଗ ଯେଉଁ ମ୍ୟାଲେରିଆ ରୋଗୀ ଚିହ୍ନଟ କରୁଛି ତା ସହିତ ମିଶା ଯାଉନି । ଦୁଇଟା ଯାକ ମିଶିଗଲେ ସଂଖ୍ୟା କେତେ ଆଗକୁ ଚାଲିଯାଆନ୍ତା ।

ସୁରେନ୍ଦ୍ର ପାତ୍ର

Comments

0 comments